Өмнөд Солонгосын ерөнхийлөгч Юн Сук Ёол Их Британид төрийн айлчлал хийх үеэр Хаан Чарльз III Blackpink хамтлагийн гишүүдийг Британийн эзэнт гүрний хүндэт гишүүний одон медалиар шагнажээ.

Хамтлагийн гишүүд болох Женни, Жисү, Лиза, Рөүз нар Британийн хаантай одон гардуулах үеэрээ ярилцаж, хамтдаа гэрэл зураг авахуулжээ.

Шагналаа аваад ихэд баяртай хоорондоо ярилцаж буй охидыг харсан Хаан Чарльз "Энэ олон жилийн дараа та нар бие биетэйгээ ярилцсаар байгаа нь гайхалтай” хэмээн хошигноод "Би хэзээ нэгэн цагт та бүхний тоглолтыг үзнэ гэж найдаж байна” гэжээ.

Blackpink хамтлагийн гишүүд 2021 онд Глазго хотод болсон НҮБ-ын уур амьсгалын асуудлаарх дээд хэмжээний COP26 уулзалтад оролцсон үүргийг хүлээн зөвшөөрч хүндэт гишүүнээр өргөмжилсөн гэж Букингемийн ордноос мэдэгдэв.

Тус хамтлаг өнгөрөгч долдугаар сард, Их Британийн томоохон хөгжмийн наадмыг тэргүүлсэн анхны К-поп хамтлаг болсон юм. Тодруулбал тэд Лондонгийн төвд байрлах BST Hyde Park-д 65,000 үзэгчтэй тоглолтоо хийсэн.

2016 онд дебютээ хийснээсээ хойш Blackpink нь дэлхийн хамгийн амжилттай яваа охидын хамтлагуудын нэг болж чадсан билээ.