Эрчим хүчний реформын хүрээнд тог, цахилгааны үнийг бодит өртөгт нь ойртуулахын тулд үе шатлалтайгаар нэмэгдүүлсэн билээ. Тэгвэл энэ нь өргөн хэрэглээний бараа бүтээгдэхүүний үнэ өсөхөд нөлөөлж, иргэд, ААН-үүдэд хүндрэл учруулж буй талаар олон нийт байр сууриа илэрхийлэх болсон.

Ялангуяа, цахилгаанаар халаалтаа шийдсэн гэр хорооллын айл өрхүүдэд хүндээр тусаж буйг иргэд хэлж байгаа юм.

Тэгвэл нийтийн өргөдлийн "D-Parliament" цахим системд иргэн С.Гэгээ өнгөрсөн нэгдүгээр сарын 22-нд "Цахилгааны үнийг бууруулах тухай" өргөдлийг санаачилсан бөгөөд өнөөдрийн байдлаар 4032 иргэн дэмжиж саналаа өгчээ. Гарын үсэг цуглуулах хугацаа энэ сарын 21-ний 18.00 цагт дуусах юм. Хэрвээ 33 мянган иргэн саналаа өгсөн тохиолдолд УИХ-аар хэлэлцэх боломж бүрдэнэ.