Оросын сөрөг хүчний удирдагч Алексей Навальныйд оноосон нэмэлт ялын дараа түүнийг хоригдож байсан шоронгоос нь шилжүүлсэн ч гурван долоо хоног ор сураггүй болоод байсан юм. Тэгвэл Навальныйг Хойд туйлын бүсэд орших алслагдсан шорон шилжүүлсэн болохыг туслахууд нь олж мэджээ.

Москвагаас зүүн хойд зүгт 1900 км-ийн зайд орших Ямало-Ненецкийн автономит тойргийн IK-3 хорих ангид Алексей Навальныйг шилжүүлсэн байна. Хахир хүйтэн өвөл удаан үргэлжилдэг энэ бүсийн шорон ЗХУ-ын үед хамгийн хүнд нөхцөлтэй хорих газруудын нэгд тооцогддог байсан юм.

Ерөнхийлөгч Владимир Путиныг эсэргүүцэн сөрөг хүчин байгуулсныхаа дараа бараг гучин жил шоронд хоригдох ял сонссон Навальный арванхоёрдугаар сарын 6-нд Москвагийн ойролцоох Владимир муж дахь шоронгоос сураггүй болсон юм. Навальныйгийн туслахууд түүнийг Оросын хорих ангийн хамгийн хатуу онцгой дэглэмтэй шорон руу шилжүүлсэн байх хэмээн таамаглаж байсан нь ийнхүү батлагджээ.