Америкийн Time сэтгүүл Аргентины хөлбөмбөгчин, “Интер Майами” клубийн довтлогч Лионель Мессиг “Оны онцлох тамирчин”-аар нэрлэжээ.

АНУ-ын клубт 2023 оны зун шилжин ирсэн Л.Месси саяхан оны шилдэг хөлбөмбөгчний шагнал болох “Алтан бөмбөг”-ийг /Ballon d'Or/ найм дахь удаагаа хүртсэнээр дээд амжилтын эзэн болсон юм.

Өдгөө 36 настай Л.Месси 2003-2021 онд Испанийн “Барселона” клубт тоглож, гоол, оновчтой дамжуулалтаараа багийнхаа дээд амжилтыг тогтоож байсан бөгөөд 2021-2023 онд Францын ПСЖ клубт хүчин зүтгэж байв.

Л.Месси 2022 онд Катарт болсон ДАШТ-д Аргентины шигшээ багийг ахлан оролцож, аргентинчууд 1986 оноос хойш 36 жилийн дараа дэлхийн аваргын цомыг өргөсөн юм. Энэ оны наймдугаар сард тэрбээр Лигийн цомд түрүүлэн 44 дэх цомоо хүртсэнээр хөлбөмбөгийн түүхэн дэх дээд амжилтын эзэн болсон билээ.