Израил-Хамасын хооронд мөргөлдөөнтэй байгаа ч АНУ-ын Ерөнхийлөгч Жо Байден Израилыг зорихоор болжээ. Дайны нөхцөл байдалтай ийм үед Ерөнхийлөгч Байден Израилыг зорих нь өндөр эрсдэл дагуулж байгаа юм.
Тодруулбал Израилын Ерөнхий сайд Бенжамин Нетаньяху АНУ-ын Ерөнхийлөгчид айлчлалын урилга илгээсэн. Жо Байден Израилыг дэмжиж буйгаа илэрхийлэхээр урилгыг хүлээн авсныг тус улсын Төрийн нарийн бичгийн дарга Энтони Блинкен мэдэгдсэн байна.
Блинкений хэлснээр АНУ болон Израил хандивлагч улс орнууд, олон талт байгууллагуудын хүмүүнлэгийн тусламжийг Газын зурвас дахь иргэдэд хүргэх төлөвлөгөө боловсруулахаар тохиролцсон гэв. "Тус бүс рүү хүмүүнлэгийн тусламж нэн яаралтай очих нь хамгийн чухал асуудал" хэмээн тэрбээр хэлжээ.
Ингэхдээ хүмүүнлэгийн тусламж Хамаст ашигтайгаар нөлөөлөхөөс болгоомжилж байна. Учир нь илгээж буй хүмүүнлэгийн тусламж Газын зурвас дахь иргэдэд очиход Хамас ямар нэг байдлаар саад болж магадгүй хэмээн Израил улс санаа зовж байгаа аж.
Эх сурвалж: CNN
