Сагсан бөмбөгийн дэлхийн аварга шалгаруулах тэмцээн Япон, Филиппин, Индонез улсуудад зохион байгуулагдаж байна. Хэсгийн тоглолтууд үргэлжилж буй энэ өдрүүдэд "Коби дэлхийн аваргад тоглож байна" гэх яриа сагсан бөмбөг сонирхогчдын дунд гарч эхэллээ.
Учир юу вэ гэвэл Йорданы шигшээ багийн довтлогч 24 дугаартай Ронди Холлис Жеффэрсон хэмээх тоглогч NBA-ийн домогт од Коби Брайнттай тун төстэй гадаад төрхтэй ба түүнийг санагдуулам гайхалтай, хамгийн хачирхалтай нь Кобитой андуурам тоглолт үзүүлж байгаа нь олныг шуугиулж байгаа юм.
Ронди Жакуан Холлис-Жеффэрсон 1995 оны нэгдүгээр сарын 3-нд төрсөн. Одоогоор Пуэрто Рико улсын BSN хэмээх лигт тоглож буй Америк-Йорданы давхар иргэншилтэй тамирчин юм. Тэрээр 2015 оны драфтын 23 дахь сонголтоор NBA-д элсэж байсан ч зургаан улирлын дараагаар NBA-д түүнийг авах баг олдоогүй тул Европыг зорьсон аж.
2017-2018 онд түүний NBA дэх кареерийн оргил үе байсан ба тухайн улиралд Брүүклин Нетс багийн бүрэлдэхүүнд 68 тоглолтод оролцохдоо 59-д нь гараанд гарч, 13.9 оноо, 6.8 самбар дунджилсан байна. Гэсэн ч дараа улирлаас нь шагайны болон ташааны бэртлүүдэд өртөж, талбай дээрх үр дүн нь буурсаар Торонто, Портланд зэрэг багууд руу жил дараалан солигдож, 2020-2021 оны улиралд Портланд багаас хасагдсан байна.
Йорданы баг Дэлхийн аваргын тэмцээний эхний тоглолтондоо Грекийн багт хожигдсон ба энэ тоглолтод Ронди 24 оноо авч, тоглолтод оролцсон бүх тоглогчдыг оноогоороо тэргүүлсэн юм. Гэсэн ч Грекийн багийн тоглолт илүү байсан учир хожигдол хүлээсэн. Тэгвэл өчигдөр тэд Шинэ Зеландын багтай тоглосон ба тоглолтын үндсэн цагийн төгсгөлд Рондигийн холын зайн шидэлт амжилттай болж, нэмээд алдаа аван чөлөөт шидэлтээр дахин нэг оноо авч тооны харьцааг тэнцүүлэн нэмэлт цаг гаргасан хэдий ч нэмэлт цагт мөн л хожигдол хүлээсэн юм. Шинэ Зеландын эсрэг тоглолтод Ронди 39 оноо авсан ч хожигдол хүлээсэн нь энэ юм.
Йорданы баг хэсгээсээ гарах боломжгүй болсон хэдий ч хэсгийнхээ бас нэгэн том баг болох АНУ-ын багтай хуваарь ёсоор наймдугаар сарын 30-ны өдөр буюу энэ лхагва гарагт тоглох юм. Түүний гайхалтай тоглолт дэлхий нийтэд Кобигийн тоглолтыг дахин үзүүлж буй талаар сэтгүүлч түүнээс асуухад "Намайг Кобитой адилтгаж байгаа нь нэр төрийн хэрэг юм. Тоглолтын үеэр бурхан миний дэргэд байсан, Коби мөн байсан" хэмээн хариулжээ.
